de les coses que facíemos allá

Una de les coses más curioses ye que cuando dices que vas dite a Africa a la xente da-y por pensar que vas en plan safari, a ver animales y a vivir nuna tribu de bantúes y salir de caza pa sobrevivir. Si, por embargo, dices que vas de voluntariu con una ong da-yos por pensar que lo que vas ye a dir a un campu de refuxaos, con una especie de chaboles tapaes por llones azulones del acnur, con milenta neños y neñes enllenos de mosques, medio moribundos, desnutríos y esfamiaos. Afortunadamente Africa ye muncho más qu'esa realidá tan sangrante que de verdá esiste, pero nun ye la única.






Dos son les coses que más m'entruga la xente a la mio vuelta. Una ye, cómo non, pola malaria y la otra ye sobro lo que ficimos allá. De la malaria y de la situación de la sanidá yá falaré n'otru momento, pero sobro lo que fui y fuimos a facer allá sí que puedo cuntar dalgo agora.




En xeneral poles coses que vemos pola tele nun mos facemos imaxe de cómo puede ser esa otra cultura, esa otra xente, esa otra manera de vivir y d'entender la vida que pueden tener allá, nuna ciudá del sur de Madagascar llamada Tulear. Unu tiende a creyer que si va allá ye porque seguru que va a poner vacunes, a dar clases de dalgo, a dirixir dalguna cosa que la probe xente que vive ellí nun sabe o nun puede facer. Nesi sen la verdá ye que lo meyor de dir a conocer a los y les amigues de Bel Avenir ye que ves que les coses furrulen ensin necesidá de que vaigas allá. Tienen una organización, un montonón de proyeutos que tan en marcha y otros na tiesta pal futuru. Y yo namás fui a velos, a conocelos, a compartilos, a acompañalos y a vivilos. Y lluéu a contalos.




Tolos llunes a les 8 la mañana hai un conceyu del personal de Bel Avenir pa cuntar lo que se fizo los díes anteriores y les coses que tan programaes pa esa selmana. La ong tien a más de 100 persones trabayando, de les que 3 son españoles y 3 franceses y lo demás malgaches. Con esa programación selmanal que se comparte, faise dempués una reunión colos voluntarios pa ver en cuáles de les actividaes vamos participar durante esos díes.




Un proyeutu de los que ta en marcha son los Centros Sociales. Hai 6 espardíos per too Tulear: Amboriky (onde vivimos nosotros), Besakúa, Mahavatse (el que se ve nesta semeya con un basureru que tien pela parte d'atrás), Tsimenatse, Andakuru y Mangavé. Nesos centros sociales van neños y neñes de les families con más necesidaes del barriu que tan escolarizaos, nel tiempo nel que nun tan nel colexiu. Fainse con ellos y elles delles actividaes: de refuerzu educativu, d'hixiene del cabello (polo de los pioyos), cuentacuentos, xuegos, asistencia al cine, salides didaútiques (a los bomberos, por exemplu), campamentos escolares,... Un gran problema pa los neños ye la falta de propuestes d'ociu asina que si nun hai nada que facer dedícanse a la nada o a caleyar. Nesi sen los centros sociales acoyen a un másimu de 50 neños y neñes que tienen una alternativa. Amás d'ello nel centru social se garanticen una comida al día (alreor de les 12 la mañana) y la merienda. Too ello coordinao poles trabayaores sociales de Bel Avenir, que visiten a les families pa face-yos un seguimientu de les sos necesidaes, tratando de cubriles. Asina, nel tema la salú, hai un o una enfermera na sede la ong onde estes families pueden dir a consulta y cuntar con melecines si son necesaries.



¿Y nos qué facemos nesos centros sociales? Pues participar de les actividaes que tengan programaes. Dende dir a xugar con ellos, a acompañalos al cine, dir con ellos a dalguno de los campamentos que se fain en Mangily (un pueblu que ta a 30 kilómetros), cunta-yos un cuentu,... Nesi sen ye importante dicir que los neños y les neñes falen malgache, como tola xente del país, los y les educaores tamién falen francés (polo menos un nivel mediu) y que yo nin falo una cosa nin la otra, asina que munches veces la participación que puedes tener vese mui llimitada por ello. Pero pa xugar a les caniques, a campos medios, al baloncestu o a la goma nun fai falta falar munchu. Y la verdá ye que tan tol rato pendientes de lo que fais, rinse siempre porque too lo que te vean facer fai-yos gracia y traten d'enseñate dalgo de malgache. Amás en cuantes que tienen un minutu pónense a cantar y a baillar y mover la cadera a una velocidá impresionante ¡¡¡Son encantaores!!!



La verdá ye que dende que llegamos tuvimos les puertes abiertes de toles actividaes y punxeron especial empeñu en que les conocieramos y participaremos de les más posibles. Tamién mos cuntaron qu'el personal malgache que trabaya direutamente colos neños y les families vense mui reforzaos y motivaos nes sos tarees cuando los vazaha (estranxeros blancos) van a compartiles y que pa los neños tamién ye una oportunidá de superase, porque toos quieren xugar contigo y enseñate les coses que saben facer. Amás siempre quieren deprender dalgo d'español (como dalgunes neñes anduvieron per España cola Malagasy Gospel pues yá saben dalgunes pallabres) y vete baillar, cosa que-yos fai muncha gracia.



Garantizase una comida'l día pa los neños ye una cosa perimportante cuando na tienda vas a comprar l'arroz o l'azucre por vasos porque nun ties perres pa más, asina que si amás de que los tos neños deprendan coses tienen garantizada la comida y l'accesu a la sanidá, pues muncho meyor.



Seguro que los nuesos güelos, que vivieron la posguerra, saben muncho d'ello.

Y te baxes del avión en Tulear y lo primeru que sientes ye una oleada d'aire caliente y polvo y ves lo que te paez que ye un desiertu arrodiando l'aeropuertu. Y cuando recueyes la mochila que, oh milagru, llegó hasta acá entera (más o menos) y sales al aparcamientu asáltente pa que cueyas un tasi. En xeneral tolos tasis en Tulear son renault 4L, el 4 latas, vamos, pero esti ye un peugeot 505 del añu la caraba y que tien la tapicería de borreguillu (¡¡¡a 40 graos!!!) y mos ameniza'l trayeutu nun radio-video-dvd de paquete nel que mos pon un video d'Enrique Iglesias (jajajajaja). Y ehí vamos al Cinema Tropic, que ye la sede de Bel Avenir, la ong contraparte d'Agua de Coco (http://www.aguadecoco.org/) na que trabaya Eva y cola que vamos a Madagascar. Como curiosidá vos cuento que ye l'únicu cine con programación estable de tol país (llévase muncho equí van damme y coses paicíes) y d'ehí Javi (unu de los ciento y pico trabayaores que tien ellí Bel Avenir) mos lleva a la que va ser la nuesa casa, nel barriu d'Amboriky, xunto a unu de los seis centros sociales que tienen per too Tulear.

Tener agua corriente, lluz y cocina de gas ye un luxu en mediu d'un barriu onde la mayor parte de les cases son pequeñes y de maera, nes que la vida nun se fai dientro sinon fuera, en munchos casos incluso lo de durmir. Y pal agua van a unes fuentes que tan coneutaes a la trayía d'agues onde una persona vende l'agua n'horariu llaboral. Como amanez a les 5 la mañana y yá ye nueche zarrada a les 6,30 la tarde pues lo normal ye qu'a les 6 la mañana yá ta tol mundu echáu a la cai. Asina que si te llevantes xusto pa dir a trabayar nel horariu oficial, que ye'l francés (8 a 12 y de 14,30 a 18) pues llegues yá pelos pelos a lo de poder desayunar en dalgún café callexeru (gargottes, que paez que les llamen).

Yá sé que tais esperando que vos cuente si realmente lo de que los remolinos d'agua nel llavabu nel hemisferiu sur se fain nel sentíu contrariu a les aguyes del reló ye verdá o non, y vos teo que dicir que sí, que puede ser posible qu'atopara'l mio llugar nel mundu onde nun ye al "revés" lo que faigo.

Y cola bici que mos dexa la ong pues tiramos pal cine, dempués de duchanos, eso sí, pa ver lo qu'ellí se cuez, pa sentir que tola xente te mira, que te saluden (sobro too los neños y neñes) y pa comprobar que l'aparente caos de xente andando, bicis, pousse pousse, 4 latas y too terrenos, ensin orde nengunu da pa sobrevivir. Y resulta que sí, que llegamos con vida y conocemos a Nacho, que tamién trabaya en Bel Avenir y vive na nuesa mesma casa. Y tenemos la nuesa primer esperiencia gastronómica en Tulear, en La Colombe, nun restaurante que nun ye pa turistes. Y de la que sales d'ellí yá ye de nueche (son les 7 y pico la tarde) y descubres que como techu tenemos millones y millones d'estrelles que mos miren pero nun mos allumen. En realidá nada mos alluma porque lo de les faroles, na zona centro, haberles hailes, pero que furrulen yá ye otra cosa. Y nel nuesu y otros barrios pues yá nin les hai, asina que mos perdemos un poco, pero mui poco y acabamos llegando a casa. ¡Nun vos facéis idea de lo complicáu que ye distinguir de nueche a xente negro que viste d'escuru!

Na nuesa casa hai un guarda. Esta ye la profesión que más xente ocupa en too Madagascar porque si ties dalgo ties que tener dalguien que lo xixile. Nun fai falta que faiga nada, basta con que tea ellí, pero tien qu'haber dalguien. Nel centru social d'Amboriky que ye onde ta la nuesa casa (ye guapa ¿eh?) ta tamién la casa del centru social y la del guarda, que ye la que veis equí al lláu. De mano resulta un poco raru lo de que teas a dalguien viviendo nesa especie de chaboluca (la canasta ye de centru social, non de la casa, claro) afuera la to casa.

Tamién tenemos un perru que ye de Nacho y que se llama como lo que más echa de menos de la so tierra (ye de Granada): Lomo. Pero en Madagascar un perru ye un perru y tien una función social que ye guardar (eso paez qu'a Lomo naide-y lu esplicó), asina que durme fuera la casa, nun come dog chow y ye mui raru ver a dalguien xugando con ellos.

Y entafarraos nuevamente de repelente de mosquitos (¡pa lo que me va a servir!), con muncho calor y cola mosquitera na cama protexiéndonos (tamos en plan bolsa de patates, con redeciella y too) mos echamos a durmir, cola sensación yá de que llevamos fuera d'Asturies mes y pico y que yá somos casique tulearenses o como se diga.

de cómo llegamos a Tana nel madreñoxiru

Y p'allá que vamos Carmen y yo nel madreñoxiru que mos lleva d'Asturies a París, Isla Mauriciu y d'ehí a Antananarivo pa colar al día siguiente pa Tulear, destín final del nuesu viaxe. Son milenta hores y milenta kilómetros pa llegar a nun se sabe bien ver qué nin cómo, a cumplir un sueñu...

Quitando que Carmen paez que se llevó con ella la mosca tse tse y nun fai más que durmir nos aviones, el viaxe va bien, como un exerciciu concentráu d'aterrizaxes y despegues... De París a Mauriciu hai 9500 km, que pa un saltu yá ta bien, y lo meyor ye que como tenemos que tar ellí varies hores enantes de tirar pa Madagascar pues mos coyemos un tasi y vamos a la playuca, a Blue Bay, que ta a quince minutinos y mos damos un bañu a les 7 de la mañana y con 24 graos de temperatura... esi ye'l nuesu alcuentru col Indicu y la barrera de coral... ¡Esto pinta paradisiacu!

Y colamos pa Tana, que ye como llamen en Madagascar a la capital, Antananarivo. Esa sensación de que entiendes les coses en varies llingües porque yes quien a descifrar lo que dicen nel avión en francés ya inglés (en tolos aviones dicen siempre lo mismo) acábase namás aterrizar en Tana. Taxi, taxi, taxi, taxi, monsieur (pa quien nun sepa francés dizse messié), madame, taxi, taxi, taxi... eso ye tolo que somos a entender y como somos unos espertos falantes na llingua gabacha pues mos entendemos en inglés, que se mos da meyor. Y tiramos a la gueta d'un hotel, que pa Tulear colamos de madrugada (eso creemos nosotros).

Una de les coses que descubres en Madagascar ye que siempre hai dalguien que coordina y asina cuando ya tamos nel hotel (en Ivato, que ye'l pueblu onde ta l'aeropuertu) vamos a Tana a conocer la ciudá nun tasi que mos faciliten dende l'hotel. Pa ello falamos con unu que ye'l tasista n'inglés y esi mos pon nes manes d'otru rapaz al que-y diz que mos lleve, mos enseñe dalgo y lluéu mos traiga de vuelta. Pero esti nun fala nada de nada. Les perres, eso sí, xestionales el coordinaor.

Y hai otra peculiaridá en too Madagascar y ye que los coches tan siempre'n reserva, asina que si montes nun tasi lo normal ye que vaiga a una gasolinera y tengas que pagá-y per adelantáu pa que pueda echar gasolina. Como curiosidá namás, pero entá nun somos a conocer el nivel de vida que tien el país más allá de que mos cobren 48000 ariaris pola nueche d'hotel y que un euru son 2960 ariaris (lo último que cambiamos yá foi a 2700), asina que con una cuenta cenciella l'hotel mos cuesta unos 16 euros, que pa dos nun mos paez munchu (ensin tele na habitación, eso sí). Lo más curiosu ye que la gasolina ta al mesmu preciu qu'equí.

Y col nuesu tasista vamos al centru de Tana y ellí polos problemes de les traducciones y tal mos enseña la estación antigua de tren (que yá nun ye tala pero ta mui guapa) y mos lleva a ver la embaxada americana, porque como falamos inglés le da por pensar que somos yanquis. Jajajajajajajaja. Acabo pisar el sur del mundu y yá piensen que soi yanqui.

Y poco más la verdá, porque como nun somos a entendemos pa que mos enseñe dalgo pues vamos a tomar unes cerveces con el. Y mos lleva a un puestu na cai onde un mozu saca les cerveces de la nevera y mos dexa'l bancu nel que ta sentáu (pa eso somos vazaha, o seya, güiris). Les cerveces son les que tomamos en tol país y son THB (Three Horses Beer), d'un tamañu de 65 cl (el doble d'una mahou) y mos paecen esaxeradamente grandes (eso se pasa colos díes y nin too ta tan gocho como paez nin casique nada ye yá tan grande, quitando les arañes). Mos cuesta 2000 ariaris cada cerveza, que vienen a ser unos 70 céntimos y nun ta nada mal... (paraisu pa los y les cerveceros).

Y yo a lo mío: en marzu hebo un golpe d'estáu en Madagascar y l'antiguu presidente Ravalomana yera tamién el dueñu de la corporación Star, que ye la que fai la cerveza, tien la concesión de la coca cola y un montonón d'empreses más nel país. El nuéu presidente Rajoelina ye un mozucu de 34 años que se ganaba la vida de pinchadiscos y que como yera famosucu llogró ser alcalde de la capital y dende ehí con golpe d'estáu pues a presidente apoyáu polos militares. Esti rapaz polo visto tenía tamién un canal de televisión y l'otru-y lu zarró y eso foi la escusa pa tol atropellu. Lo más graciosu (por dicir dalgo) del asuntu ye que hai un doble gobiernu, dobles ministros y dobles alcaldes per tol país. Y conste que nun toi falando d'Hondures, pero lo cierto ye que de lo de Madagascar n'España nun s'oi cuntar nada.

Visto lo visto yá nun me queda nada que facer na vida, porque lo de tener un nenu o nena paez que pol momentu non, lo de plantar un arbol pues tampoco y lo de escribir un llibru pues... (si esto val como llibru pues entós yá fice dalgo de méritu na mio esistencia). Pero claro, a los mios años nun me da yá nin pa ser golpista, que veo que les nueves xeneraciones vienen pisando fuerte neso tamién.

Y de vuelta pal hotel el nuesu tasista, vamos llamalu Luis porque nun somos a recordar el nome que mos dixera, que yá se va entendiendo un poco con Carmen en francés básicu, mos lleva a Petit Madagascar, que ye un gran mercáu al aire llibre onde se vende de too y que por razones de seguridá dexamos rapidino a indicación suya. Son les 6 de la tarde y yá ye de nueche. Y somos blancos...

Y de la que mos vamos mos enseña la nueva embaxada yanqui que tan acabando de construir y un megarascacielos allumáu con lluces de colores que se ve mui bien dende l'aire y dende tolos sitios y mos diz que ye un hotel de, sorpresa sorpresa, la hermana del anterior presidente, Ravalomana.

Nel nuesu hotel cenamos (por 36000 ariaris, unos 12 euros) dalgo de comida medio china o con pinta d'ello (chinos nun hai munchos pero una parte de la población ye d'ascendencia hindú, llámenlos karanas y son la xente que tien los comercios y paez ser que según mos cuntaron más alantre, son la cumal de la esplotación de la xente de la población malgache, per encima de los propios malgaches y tamién de los vazaha, o seya, los blancos) y tamién pidimos ravitoto, que ye carne (supongo que de zebú) con una especie de papilla de yerbes entemecíu con ello y munchu arroz. Básicamente en tol país cómese arroz y más arroz y delles vegaes arroz con arroz... y eso si ties suerte.

Ye 25 d'ochobre de nueche, va un día que salimos d'Asturies y mos paez que va yá un mes y entá nun llegamos al destín. Con ello y mosquitera, bien entafarraos de repelente pa mosquitos, vamos pa la cama, que mañana ye otru día y hai que dir pa Tulear nun avión que sal a les 5:45 de la mañana...

Pero esa yá ye otra historia.

yá

¿sabéis esi cosquilléu que te xube de los pies a la cabeza? pues eso...

presta

lo que se queda

Namás 3 díes yá o 3 díes tovía y too a medies de facer. Dexando milenta coses pa última hora, como siempre.

Acá se queda'l festival de la miel de Bual, Llanes al cubo, la gueta les castañes, los amagüestos, muncha sidra por beber, munches rises y mui bonos momentos, muncha xente a la que quiero y me quiere, el feis, los correos lletrónicos, el móvil, dir a trabayar, el coche,...

Ayeri me permití'l luxu de tener varios momentos de reláx y de rises (munches) en mui bona compañía. Nun quiero tener la sensación de que voi quedar agotáu yá enantes de colar pa Tulear porque quiero llegar descansáu pa nun tener la escusa de que hubo dalgo que nun viví o nun fice por cansanciu, porque quiero vivilo y saborialo too como fain los mios sobrinos cuando tienen dalgo nuéu nes sos manes, que lo manoseen, pónense nerviosos y gocen descubriendo toles posibilidaes que tien esa novedá.

Voi a Madagascar y me siento un poco Alex, un poco Melman, un poco Gloria y un poco Marty viviendo la mio aventura de fugame de Llangréu porque quiero saber cómo ye la vida fuera del zoo nel que habito tolos díes.

Una de les primeres coses que teo que facer ye comprobar si ye verdá eso de que nel hemisferiu sur l'agua vase pel desagüe faciendo un remolín al revés qu'equí. Yo, yá lo sabéis, revuelvo'l café nel sentíu contrariu a les aguyes del reló y puede pasar que tando nesi otru mundu descubra que llevo tola vida revolviendo les coses d'ésta manera porque dende siempre pertenezo a esi llugar, onde les coses qu'equí se dicen que son al revés, ellí son de lo más normal.

Voi poneme agora mesmo a facer la mochila, que necesito saber yá tolo que me falta pa ver si mañana me da tiempo a conseguilo.

preparando'l camín

Yá namás queda una selmana y entá sigo preparando, sigo ensin saber casique nada de francés y sigo nerviosu porque voi pa Madagascar a cumplir un sueñu de cuantayá.

Voi de la tierra del texu a la tierra del baobab, esi arbolón xigantescu que dicen que ta plantáu del revés porque les sos rames son tan gordes que paecen más bien raigaños y que son tan vieyos como los texos. Ye poro que guarden la memoria de la tierra, de les xentes y del sol y la lluna.

Voi acompañáu nesti camín por Eva, Carmen y César (gracies infinites a los tres por compartir conmigo esti sueñu) a conocer otru mundu, otra realidá, otra forma de vivir. Voi a enamorame d'otra tierra y d'otra xente, de coses cencielles, de sueños cumplidos y de llabor por facer de la mano de xente que yá la ta faciendo. Rises, vida, calor, allegría...

Por cierto, tamos a 17 d'ochobre, día internacional pa la erradicación de la probitú, asina qu'entamar güei esti testimoniu del mio camín, paezme que nun podía ser más acertáu.

Voi facer el mio simulacru de mochila con toles coses que teo que llevar. Lo importante, lo de dientro, espero que me sorprenda ellí mesmo...